कोकणातले हायकू २

पांढरी वाळू
निळा समुद्र
कष्टाने काळवंडलेले लोक...

अनंत ढवळे

कोकणातले हायकू

कोकणातली उदास संध्याकाळ
माडांपलीकडून
समुद्र घोंघावतोय

अनंत ढवळे

चुकत नाही
गवतावर साचलेल्या बर्फातून
अन्न शोधून काढणं

अनंत ढवळे

30/05/2013

१.

दूर वर पसरून राहिलेत
जागेपणाचे संदर्भ
पाऊस पडून गेल्यानंतरच्या हवेत

२.

पाण्यावर हलणारं एखादं वलय
दूरात टिटवीचा आवाज
बाकी काहीच नाही

अनंत ढवळे

२८/०५/१३

अशातले हायकू

1.

थंड बोचरा वारा
मध्येच कुठे पाण्याचा एक ओहोळ
दगडी रस्त्यावर संध्याकाळ उतरलेली

2.

एक वर्ष निघून गेलंय
दाटून राहिलीए
आणखी एक पानगळ

3.

जुने संदर्भ मागे सोडून
निरोप घेताहेत
सप्टेंबरची उन्हे

अनंत ढवळे

या स्थळावर काही माझे, तर काही जपानी अनुवादित हायकू देण्याचा विचार आहे. अनुवाद या पूर्वीच्या एखाद्या अनुवादाशी मिळते जुळते असतील तर तो निव्वळ योगायोग समजावा..

बाशोचे हायकू...
( Marathi Translations of Matsuo Basho's  ( 松尾 芭蕉 ) Haiku pomes; Translated by Anant Dhavale)

1.

तू बघणार नाहीस
हे अथांग एकाकीपण
किरी झाडाचं एखादं गळणारं पान

2.

शिशिरातल्या या संध्याकाळी
मी एकटाच
चालत जातोय

3.

वर्षातला पहिला दिवस
विचारांमध्ये गुरफटलेलं एकाकीपण
शिशिरातली संध्याकाळ दाटून आलेली

4.

एक जुनाट तळं
एका बेडूक उडी मारतो
छपा़क!

5.

विजा चमकताहेत
हेरॉन पक्षांचं रडणं
अंधार भोसकून जातंय

6.

सिकाडा किड्यांची किरकिर
सांगत नाही
ते किती दिवस जगणारेत अजून

7.

चांदणं न्याहाळतंय
तांदूळ दळता दळता
गरिबीचं मूल

8.

देवळांच्या घंटा विझल्या तरी
संध्याकाळ ताजीच ठेवून आहेत
हे सुगंधी बहर

9.

आज समुद्र खवळलेत
साडो बेटावर झाकोळून आलेत
तारकांचे ढग

10.

कशासाठी झुरतंय, हे सुकलेलं मांजर
उंदरांसाठी, माश्यांसाठी
की परसबागेतल्या प्रेमासाठी


11.

हे दवबिंदूंनो
मला तुमच्या लहानशा गोड्या पाण्यात
धुऊ देत हे जीवनाचे धूमिल हात...

12.

मी
आपली न्याहारी उरकतो
पहाटेची प्रभा बघत बघत

13.

शांत पहुडलेलं जुनं गाव
फुलांचा सुगंध दरवळत जातोय
दूर कुठेतरी सायंकाळची घंटा वाजतेय....


मुक्त अनुवाद : अनंत ढवळे